საქართველოს ადგილობრივ თვითმმართველობათა ეროვნული ასოციაციის (NALAG) წარმომადგენელმა და პროექტის – „მწვანე ტურიზმი და ისტორიული მემკვიდრეობა – შავი ზღვის აუზის განვითარების საფუძვლები“ მენეჯერმა – ტატიანა ბოკუჩავამ, ქობულეთის მუნიციპალიტეტის მერიის ეკონომიკის, ქონების მართვის, ტურიზმისა და საინვესტიციო განვითარების სამსახურის უფროს სპეციალისტთან – ნინო ჩხეტიასთან და ქალაქ ფოთის #3 საჯარო სკოლის მე-11 კლასის მოსწავლესთან და კოლხეთის მოხალისე გიდთან – ანიტა ქაცარავასთან ერთად, შავი ზღვის თანამშრომლობის პროგრამის ფარგლებში გამართულ სამდღიან საერთაშორისო კონფერენციაში მიიღო მონაწილეობა.

ღონისძიება, რომელიც საბერძნეთში, ორესტიადას მუნიციპალიტეტში გაიმართა, საქართველოს, უკრაინის, მოლდოვას, საბერძნეთის, რუმინეთისა და მასპინძელი ქვეყნის – საბერძნეთის მუნიციპალიტეტებში არსებული საუკეთესო მაგალითების გაზიარებას დაეთმო.

კონფერენციის მონაწილეებმა, ისეთ ინოვაციურ პრაქტიკებზე ისაუბრეს, რომლებიც კულტურული მემკვიდრეობისა და ინფრასტრუქტურის მიმართულებით, თანამედროვე ეკონომიკური და სოციალური გამოწვევების დაძლევასა და უკეთესი მომავლის ხელშეწყობაზეა ორიენტირებული.

ქართულმა მხარემ, უცხოელ კოლეგებს, პროექტის სამიზნე მუნიციპალიტეტებში, კერძოდ, ქობულეთსა და ფოთში მიმდინარე ღონისძიებების შესახებ მიაწოდა ინფორმაცია.

ნინო ჩხეტიამ, პრეზენტაციისას მდგრადი განვითარების 17 მიზანზე გაამახვილა ყურადღება და აღნიშნული მიმართულებით, ქობულეთის მუნიციპალიტეტში განხორციელებულ ღონისძიებებს გაუსვა ხაზი.

ანიტა ქაცარავას პრეზენტაცია კი, კოლხეთის ეროვნული პარკის ეკოტურისტული პოტენციალის მნიშვნელობასა და ეკონომიკური და სოციალური გამოწვევების დაძლევის კუთხით, მისი განვითარების პერსპექტივებზე მსჯელობას დაეთმო.

ანალოგიური პრეზენტაციები წარადგინეს პროექტის პარტნიორი ქვეყნების წარმომადგენლებმაც, რის შემდეგაც კონფერენცია დისკუსიის ფორმატში გაგრძელდა.

ღონისძიების დასასრულს პარტნიორთა რიგით მე-8 შეხვედრაც გაიმართა, სადაც ტატიანა ბოკუჩავამ პროექტის ფარგლებში ათეას მიერ განხორციელებული ღონისძიებების ანგარიში წარადგინა.

აღსანიშნავია, რომ საბერძნეთში გამართულ კონფერენციაში, რომელიც 18-20 ნოემბერს მოეწყო, ქართული მხარე ქვეყანაში არსებული რეგულაციების გამო ონლაინ რეჟიმში ჩაერთო.

პროექტი ,,მწვანე ტურიზმი და ისტორიული მემკვიდრეობა“, რომელსაც ბულგარეთის შავი ზღვის ადგილობრივი ორგანიზაციების კავშირი (UBBSLA) საქართველოს ადგილობრივ თვითმმართველობათა ეროვნულ ასოციაციასთან (NALAG), ასევე რუმინეთის, საბერძნეთის, მოლდოვასა და უკრაინის ორგანიზაციებთან თანამშრომლობით ახორციელებს, 2018 წელს დაიწყო და მიმდინარე წელს დასრულდება.